අප සැවොම නව වසරක් වෙත පිය මං කරන මේ අවස්ථාවේ දී, ශ්‍රී ලංකාවේ ඉදිරි ආර්ථික පුනර්ජීවනය සහ ගෝලීය ප්‍රවණතාවලින් ප්‍රයෝජන ගැනීම සඳහා ලාංකේය ව්‍යවසායකයින්ට සුවිශේෂී අවස්ථාවක් නිර්මාණය වී ඇත. 2025 වර්ෂය සඳහා ඔබ විසින් අවධානය යොමු කළ යුතු කරුණු හයක් පහතින් දැක්වේ:
- ඩිජිටල්කරණය වන්න: වර්තමාන ලෝකය තුළ ඇති වී තිබෙන තාක්ෂණික දියුණුවත් සමඟ, ඩිජිටල්කරණය වීම යනු තවදුරටත් ව්‍යාපාරයකට ආභරණයක් නොව, එය අත්‍යාවශ්‍ය සාධකයක් බවට පත් වී හමාරය. එම නිසා ශ්‍රී ලාංකේය ව්‍යාපාර විසින් තම මෙහෙයුම් විධිමත් කිරීමට, පාරිභෝගික අත්දැකීම් වැඩිදියුණු කිරීමට සහ නව ආදායම් මාර්ග විවෘත කර ගැනීම සඳහා කෘතිම බුද්ධිය (AI), Machine Learning, Internet of Things (IoT) වැනි අති නවීන තාක්ෂණික ක්‍රමෝපායන් අනුගමනය කිරීම වෙත තම අවධානය යොමු කළ යුතු ය.
- තිරසාරභාවය කෙරෙහි අවධානය යොමු කරන්න: පාරිභෝගිකයින් විසින් යමක් තෝරා ගැනීමේ දී සහ ආයෝජකයින් විසින් අවස්ථා සෙවීමේ දී උනන්දු වන ප්‍රධාන කාරණයක් බවට තිරසාරභාවය පත් වී ඇත. ශ්‍රී ලාංකේය ව්‍යවසායකයින් විසින් තම ව්‍යාපාර, අපද්‍රව්‍ය අවම කිරීම, බලශක්ති සංරක්ෂණය සහ සදාචාරාත්මක ව අමුද්‍රව්‍ය ලබා ගැනීම වැනි තිරසාර භාවිතාවන්වලට අනුකූලව හැඩගැස්සවිය යුතු ය. මෙය පරිසරය වෙත කරන යහපතක් පමණක් නොව, මෙයින් එම ව්‍යාපාරවල සන්නාමය ශක්තිමත් වී, ඒ වෙත පරිසර හිතකාමී පාරිභෝගිකයින් ආකර්ෂණය කර ගැනීම සඳහා ද මග පාදනු ඇත.
- අපනයන අවස්ථා ගවේෂණය කරන්න: ව්‍යාපාරයක් විසින් තම ඕනෑම නිෂ්පාදනයක් හෝ සේවාවක්, විවිධාංගීකරණය කිරීම වෙත අවධානය යොමු කිරීම අනිවාර්ය වේ. වර්තමානය වන විට ශ්‍රී ලාංකේය වෙළඳපොළ තුළ අපනයනය යන වචනය ප්‍රධාන මාතෘකාවක් බවට පත් වී හමාර ය. එබැවින් ඔබේ නිෂ්පාදනය ලෝකය වෙත රැගෙන යෑමට තරම් විභවයක් ඇති නිෂ්පාදනයක් නම්, මේ ඒ ගැන කල්පනා කිරීමට හොඳම කාලය වේ. එසේ නොවේ නම්, ඒ තුළින් ලෝකය වෙත රැගෙන යා හැකි අතුරු නිෂ්පාදනයක් නිර්මාණය කිරීම වෙත හෝ අවධානය යොමු කරන්න. ජාත්‍යන්තර ඉල්ලුමට සරිලන, නිශ්චිත කාණ්ඩ සඳහා ඉලක්ක කළ හැකි නිෂ්පාදන සහ සේවාවන් වන, කාබනික ආහාර, අත්කම් ශිල්ප සහ විවිධ මෘදුකාංග වැනි විකල්ප වෙත අවධානය යොමු කිරීම මගින් සැලකිය යුතු වර්ධනයක් සහ විදේශ විනිමයක් ඉපයීමට අවස්ථාව හිමි වනු ඇත.
- නිපුණතා සංවර්ධනය කෙරෙහි අවධානය යොමු කරන්න: ඕනෑම සාර්ථක ව්‍යාපාරයක කොඳුනාරටිය වන්නේ නිපුණතාවලින් පරිපූර්ණ, දක්ෂ ශ්‍රම බලකායකි. ශ්‍රී ලාංකේය ව්‍යාපාර විසින් තම ශ්‍රම බලකායේ නිපුණතා වැඩි කිරීමට සහ ක්ෂේත්‍රය තුළ ඉදිරියෙන් සිටීම සඳහා සේවක පුහුණු ව්‍යාපෘති සහ සංවර්ධන වැඩසටහන් වෙත ආයෝජනය කිරීම කළ යුතු ය. මෙම ක්‍රියාවලිය සඳහා පිළිගත් පාඨමාලා සහ සහතික ලබා දීම වෙනුවෙන් අධ්‍යාපනික මධ්‍යස්ථාන, කර්මාන්ත සංසද හෝ මාර්ගගත ඉගනුම් ක්‍රමවේද සමග හවුල්කාරීත්වයන් ඇති කර ගැනීම ද සිදු කළ හැකි ය.
- ශක්තිමත් සබඳතාවන් ගොඩ නගා ගන්න: වඩාත් සංකීර්ණ වූ ව්‍යාපාර ලෝකය තුළ නිවැරදි මග සොයා ඉදිරියට යාමට ඇති හොඳම ක්‍රමය වන්නේ සබඳතා ඇති කර ගැනීම වේ. ශ්‍රී ලාංකේය ව්‍යාපාරිකයින් විසින් නිරතුරුව ම වෙනත් ව්‍යාපාර, රාජ්‍ය ආයතන සහ ජාත්‍යන්තර සංවිධාන සමග උපාය මාර්ගික සබඳතාවන් ඇති කර ගැනීම කෙරෙහි තම අවධානය යොමු කළ යුතු ය. මෙම සබඳතාවන් හරහා නවෝත්පාදනය ඇති කරමින් ව්‍යාපාරයේ වර්ධනය වේගවත් කර ගැනීම සඳහා ව්‍යාපාර වෙනුවෙන් නව වෙළඳපොළ, සම්පත් සහ විශේෂඥ දැනුම වෙත ප්‍රවේශයක් නිර්මාණය කර දෙනු ඇත.
- සමාජ බලපෑම දෙස බලන්න: ශ්‍රී ලාංකේය ව්‍යාපාර විසින් හුදෙක් තම ලාභය වැඩි කර ගැනීමේ අරමුණින් ඔබ්බට ගොස්, සමාජය වෙත ධනාත්මක බලපෑමක් ඇති කිරීමට උත්සාහ කිරීම ඉතා වැදගත් වේ. තම ව්‍යාපාර ආකෘතිය සඳහා සමාජ වගකීම යන්න ඒකාබද්ධ කිරීම මගින් ඔවුන්ට, දරිද්‍රතාව, සමාජ අසමානතාව සහ පාරිසරික පරිහානිය වැනි බරපතළ ගැට‍ළුවලට මුහුණ දීම වෙනුවෙන් යම් සහයක් විය හැකි ය. මේ හරහා එම ව්‍යාපාරවල සන්නාමයේ කීර්තිය වැඩිදියුණු වෙනවා පමණක් නොව, ශ්‍රී ලංකාව වෙත වඩාත් තිරසාර සහ සාධාරණ අනාගතයක් හිමි කර දීමේ විශාල කර්තව්‍යයට ද ඔවුන් දායකත්වයක් සපයනු ඇත.
ශ්‍රී ලාංකේය ව්‍යවසායකයින්ට මෙම අනාගතවාදී ඉලක්ක වෙත තම අවධානය යොමු කිරීම හරහා, ශීඝ්‍රයෙන් වෙනස් වන ගෝලීය ආර්ථිකය තුළ දීර්ඝ කාලීන සාර්ථකත්වයක් වෙත ගමන් කිරීමට හැකියාව ලැබෙනු ඇත.
2025 වර්ෂය, ශ්‍රී ලාංකේය ව්‍යවසායකයින්ගේ නවෝත්පාදනය, වර්ධනය සහ ධනාත්මක බලපෑම උපරිම වන වර්ෂය බවට පත් කර ගැනීම සඳහා, පිළිවෙතින් පෙළගැසෙමු.
Diriya කණ්ඩායමෙන් ඔබට උණුසුම් සුබ පැතුම්, අප ඔබේ සාර්ථකත්වය වෙනුවෙන් බලා සිටින්නෙමු!
