උපායමාර්ගික සැලසුම්කරණය යනු එහි විශාලත්වය පිළිබඳ නොසලකමින් ඕනෑම ව්‍යාපාරයක් සඳහා වැදගත් විය හැකි ක්‍රියාවලියකි.
කෙසේ වෙතත් එය වර්තමානයේ වෙනස් වන වෙළඳපොළ තුළ කුඩා ව්යාපාර සඳහා ඵලදායි ලෙස වෙනස්කම් සිදු කරනසාධකයක් විය හැකි.
මෙහි දී අප විසින් දැක්මක් සකසා ගැනීම, මෙහෙයුමක් නිර්වචනය කර ගැනීම, ඉලක්ක සහ අරමුණු ස්ථාපිත කර ගැනීම ඇතුළු කුඩා ව්යාපාර සඳහා උපායමාර්ග සැලසුම්කරණයේ ප්‍රධාන අංග පිළිබඳ සොයා බැලීමට නියමිතයි.
දැක්මක් නිර්මාණය කර ගැනීම
දැක්මක් යනු ව්‍යාපාරයක් විසින් දීර්ඝ කාලීනව සාක්ෂාත් කර ගැනීමට බලාපොරොත්තු වන්නේ මොනවා ද යන්න පිළිබඳ සංක්ෂිප්ත සහ ආශ්වාදජනක විස්තරයකි. එය සමාගමේ/ව්‍යාපාරයේ අපේක්ෂිත අනාගතය පිළිබඳ පැහැදිලි අදහසක් ලබා දෙන මාර්ගෝපදේශයක් ලෙස ද හඳුන්වා දිය හැකි. කුඩා ව්යාපාර සඳහා බලගතු දැක්මක් නිර්මාණය කර ගැනීම උපායමාර්ගික සැලසුම්කරණයේ මූලික පියවරකි.
ඔබේ දැක්ම සකසා ගැනීමේ දී පහත සඳහන් කරුණු පිළිබඳ සලකා බලන්න.
- පැහැදිලි බව: සේවකයින්ගේ සිට ගනුදෙනුකරුවන් දක්වා සියලු පාර්ශවකරුවන්ට ඔබේ දැක්ම ඉතා පැහැදිලි සහ පහසුවෙන් තේරුම් ගත හැකි බව තහවුරු කර ගන්න.
- උත්තේජනය: පොදු ඉලක්කයක් වටා ඔබේ කණ්ඩායම රැස් කිරීමට උත්තේජනයක් ලබා දෙන ලෙසින් සහ අභිප්‍රේරණය කරන අන්දමින් එය (දැක්ම) නිර්මාණය කරන්න.
- පෙළගැස්ම: ඔබේ දැක්ම සමඟ ඔබේ වටිනාකම්, ඉලක්ක සහ වෙළඳපළ යථාර්ථය සමපාත වන බව තහවුරු කර ගන්න.
- යථාර්ථවාදී වීම: ඔබේ දැක්ම අධිෂ්ඨානශීලී විය යුතු අතර, ඒවා සාක්ෂාත් කර ගත හැකි විය යුතුයි. එයින් ඔබේ කණ්ඩායම එම දැක්ම කරා ළඟා වීමට විශ්වාසයෙන් යුතුව සිටිනු ඇත.
උදාහරණය;
කුඩා දේශීය බේකරියකට “අප ගුණාත්මක සහ සුවිශේෂී පාරිභෝගික සේවාවක් ලබා දීමට කැප වෙමු. එමෙන්ම ප්‍රසිද්ධ, නැවුම් බේකරි නිෂ්පාදන සඳහා ගැනුම්කරුවන්ගේ ගමනාන්තයක් බවට පත් වෙමු,” වැනි දැක්මක් තිබිය හැකි.
මෙහෙයුම නිර්වචනය කර ගැනීම
මෙහෙයුම් ප්‍රකාශයක් මගින් ඔබේ ව්‍යාපාරයේ අරමුණ සහ විෂය පතය ප්‍රකාශ කිරීමෙන් ඔබේ ව්යාපාර දැක්ම සම්පූර්ණ කරනු ඇති. එමගින් ඔබේ ව්‍යාපාරය පවතින්නේ ඇයි ද යන්නට සහ එය දිනෙන් දින සාක්ෂාත් කර ගන්නා ඉලක්ක මොනවා ද යන්නට පිළිතුරු සපයයි. මෙහෙයුම් ප්‍රකාශය නිශ්චිත, සංක්ෂිප්ත සහ ක්‍රියාකාරී එකක් විය යුතුයි.
ඔබගේ මෙහෙයුම් ප්‍රකාශය සැකසීමේ දී පහත කරුණු පිළිබඳ සලකා බලන්න.
- අරමුණ: ඔබේ ව්‍යාපාරය පවතින්නේ ඇයි ද යන්න සහ එය ඔබේ ගනුදෙනුකරුවන්ට හා ප්‍රජාවට ප්‍රතිලාභ ලබා දෙන අයුරු පැහැදිලිව සඳහන් කරන්න.
- වටිනාකම: ඔබේ ව්යාපාර මෙහෙයුම් සඳහා මග පෙන්වන මූලික වටිනාකම් සහ මූලධර්ම පිළිබිඹු කරවන්න.
- සුවිශේෂීත්වය: අනෙක් ව්යාපාර තරගකරුවන්ගෙන් ඔබේ ව්‍යාපාරය වෙන් කරන්නේ මොනවාද යන්න ඉස්මතු කරන්න.
උදාහරණය;
දේශීය බේකරියක් සඳහා මෙහෙයුම් ප්‍රකාශය මේ අයුරින් වනු ඇත.
“ආදරයෙන් සාදන ලද නැවුම්, රසවත් බේකරි නිෂ්පාදන මගින් අප ප්‍රජාව සතුටට පත් කරමින්, හැකි සෑම විටම දේශීය මූලාශ්‍රයන් සහිත අමුද්‍රව්‍ය භාවිත කරමින් සහ සෑම කෙනෙකුට ම පවුලේ අය මෙන් හැඟෙන උණුසුම් පිළිගැනීමකින් යුත් පරිසරයක් නිර්මාණය කිරීම.”
ඉලක්ක සහ අරමුණු සකසා ගැනීම
පැහැදිලි දැක්මක් සහිත මෙහෙයුමකින් පසුව මීළඟ පියවර වන්නේ ඒවා සාක්ෂාත් කර ගැනීම සඳහා උපකාර වන ඉලක්ක සහ අරමුණු ස්ථාපිත කර ගැනීමයි. ඉලක්ක යනු ඔබේ දැක්ම සහ මෙහෙයුම සමඟ සමපාත වන පුළුල් ප්‍රකාශයන් වේ.
අනෙක් අතට අරමුණු යනු ඔබේ ඉලක්ක සඳහා සහය ලබා දෙන විශේෂිත, මිනුම් කළ හැකි සහ කාලානුරූපී ඉලක්ක වේ.
කුඩා ව්‍යාපාරවලට බොහෝ විට ඇත්තේ සීමිත සම්පත් වන අතර, එම නිසා වඩා වැදගත් බලපෑමක් ඇති කරන ප්‍රධාන ඉලක්ක සහ අරමුණු කිහිපයක් කෙරෙහි අවධානය යොමු කිරීම ඉතා වැදගත් වනු ඇති.
ඉලක්ක සහ අරමුණු සකසා ගැනීමේ දී මෙම කරුණු පිළිබඳ සලකා බලන්න.
- SMART සැකැස්ම; ඔබේ අරමුණු නිශ්චිත (Specific), මිනුම් කළ හැකි (Measuring), ළඟා කර ගත හැකි (Achievable), අදාළ (Relevant) සහ කාලානුරූපී (Time-Bound) ඒවා කර ගන්න.
- ප්‍රමුඛත්වය ලබා දීම: ඔබේ ව්‍යාපාරය ඉදිරියට ගෙන යන අතිශය තීරණාත්මක ඉලක්ක වෙත අවධානය යොමු කරන්න.
- පෙළගැස්ම: සෑම අරමුණක් ම ඔබේ දැක්ම සහ මෙහෙයුම සාක්ෂාත් කර ගැනීමට සෘජු දායකත්වයක් ලබා දෙනවා ද යන්න තහවුරු කර ගන්න.
උදාහරණය;
බේකරිය සඳහා ඉලක්කය “නගරයේ ඉහළම ශ්‍රේණියේ බේකරි අතරට පැමිණීම.”
මෙය සාක්ෂාත් කර ගැනීම සඳහා අරමුණ වන්නේ “අන්තර්ජාලය හරහා පාරිභෝගික සමාලෝචන ලැබීම ඉදිරි වසර තුළ 20%කින් ඉහළ දමා ගැනීම.”
සාර්ථකත්වය සඳහා උපායමාර්ග සැකසීම
ඔබේ ඉලක්ක සහ අරමුණු ස්ථානගත කර ගැනීමෙන් පසුව ඒවා වෙත ළඟා වීමට උපායමාර්ග සකස් කිරීමේ කාලය එළඹෙනු ඇති. උපායමාර්ග යනු ඔබේ අරමුණු සාක්ෂාත් කර ගැනීම සඳහා ඔබ සම්පත් වෙන් කරන්නේ කෙසේ ද, තීරණ ගන්නේ කෙසේ ද සහ ඒවා ක්‍රියාත්මක කරන්නේ කෙසේ ද යන්න වෙනුවෙන් සකසන ඉහළ මට්ටමේ සැලසුම් ය.
බේකරියක් සඳහා භාවිත කළ හැකි උපායමාර්ග කිහිපයක් පහතින් දැක්වේ.
- නිෂ්පාදන පුළුල් කිරීම: පුළුල් පාරිභෝගික පදනමක් ආකර්ෂණය කර ගැනීම සඳහා නව නිෂ්පාදන හෝ කාලීන දීමනා හඳුන්වා දීම.
- අලෙවිකරණ සහ ප්‍රවර්ධනය: දේශීය වෙළඳ ප්‍රචාරණය වෙනුවෙන් ආයෝජනය කිරීම, සමාජ මාධ්‍ය අලෙවිකරණය සහ අවට ව්යාපාර සමඟ හවුල්කාරීත්වය ගොඩ නගා ගැනීම මගින් ව්‍යාපාරය ප්‍රචාරණය කිරීම.
- පාරිභෝගික අත්දැකීම: පාරිභෝගික සේවා වැඩිදියුණු කිරීම, සමාජ මාධ්‍ය ඔස්සේ පාරිභෝගිකයන් සමඟ සම්බන්ධ වීම සහ ඔවුන්ට වාසි හිමි කර දීම මඟින් කල්පවත්නා සබඳතා ගොඩනගා ගැනීම.
- මෙහෙයුම් කාර්යක්ෂමතාව: පිරිවැය අඩු කිරීමට සහ ලාභය වැඩි කිරීමට නිෂ්පාදන ක්‍රියාවලිය විධිමත් කිරීම සහ ඉන්වෙන්ට්‍රි කළමනාකරණය ප්‍රශස්තකරණය කළ හැක.
- ප්‍රජාව සමඟ සම්බන්ධ වීම: ප්‍රාදේශීය වැඩවලට සක්‍රියව සහභාගී වීම, පුණ්‍ය කටයුතු සඳහා සහය ලබා දීම සහ ප්‍රජාවේ අනිවාර්ය කොටසක් බවට පත් වීම.
අවසන් වශයෙන්,
උපායමාර්ග සැලසුම්කරණය යනු කුඩා ව්යාපාර සඳහා සාර්ථකත්වය වෙනුවෙන් මාර්ගගත සිතියමක් ලෙස හඳුන්වා දිය හැක. පැහැදිලි දැක්මක් සැකසීමෙන්, බලගතු මෙහෙයුමක් නිර්වචනය කර ගැනීම මගින්, SMART ඉලක්ක සහ අරමුණු ස්ථාපිත කර ගැනීම මගින් සහ ඵලදායී උපායමාර්ග සැකසීම මගින් කුඩා ව්‍යාපාරවලට තරගකාරී වෙළඳපළ තුළ නොනැසී සිටිනවා මෙන්ම දියුණු වීමට ද හැකිය.
උපායමාර්ගික සැලසුම්කරණය අඛණ්ඩ ක්‍රියාවලියක් බව මතකයේ තබා ගත යුතුය. එම නිසා වෙනස් වන තත්වයන්ට අනුවර්තනය වීම සහ ඔබේ දැක්ම අනුව ඉදිරියට යාමට ඔබේ උපායමාර්ග නිරන්තරයෙන් සමාලෝචනය කර ගැනීම අත්‍යාවශ්‍ය වේ.
