ශ්‍රී ලංකාවේ වර්තමාන ආර්ථික තත්ත්වය තරමක් ගැටලුකාරී ස්වරූපයක් ගන්නා අතර, එමගින් කුඩා හා මධ්‍ය පරිමාණ ව්‍යාපාරවලට (SME) එල්ල කරන බලපෑම සුළුපටු නොවේ.
ඔබේ කුඩා හා මධ්‍ය පරිමාණ ව්‍යාපාරය පසුබෑමකට ලක් වීමට බලපාන ප්‍රධාන හේතු 7ක්:
මූල්‍ය කළමනාකරණය:
- අයවැය නිසි ලෙස ගණනය නොකිරීම: ආදායම් හා වියදම් පිළිබඳ නිවැරදි අවබෝධයක් නොමැති වීම නිසා මුදල් ප්‍රවාහයේ ගැටලු ඇති විය හැකි. එමගින් මෙහෙයුම් පිරිවැය ආවරණය කිරීමට සහ ව්‍යාපාරයේ වර්ධනය වෙනුවෙන් ආයෝජනය කිරීමට අවශ්‍ය ප්‍රතිපාදන සොයා ගැනීම අපහසු වනු ඇත.
- ණය කළමනාකරණය දුර්වල වීම: ඉහළ ප්‍රමාණවල ණයවලින් ඔබේ මුදල් ප්‍රවාහයට බලපෑමක් ඇති විය හැකි. එවිට ඔබේ අනපේක්ෂිත තත්ත්වවලට මුහුණ දීමේ හැකියාව සීමා වනු ඇත.
අලෙවිකරණය සහ අලෙවි උපාය මාර්ග:
- වෙළඳපොළ පිළිබඳ පර්යේෂණ අවම වීම: ඔබේ ඉලක්කගත පාරිභෝගික ප්‍රජාව සහ ඔවුන්ගේ අවශ්‍යතා පිළිබඳ හඳුනා නොගැනීම මගින් ඔබේ අලෙවිකරණ උපාය මාර්ග අකාර්යක්ෂම වී, පාරිභෝගික සබඳතාව අවම විය හැකි.
- පාරිභෝගික සේවාව දුර්වල වීම: මෙය කුඩා හා මධ්‍ය පරිමාණ ව්‍යාපාරවලින් බොහෝ විට නොසලකා හරින අංශයක්. නමුත් පාරිභෝගිකයින් සමඟ සුහද සබඳතාවක් ගොඩනගා ගැනීම ව්‍යාපාරයකට අතිශයින් ම වැදගත්.
නවෝත්පාදනය සහ අනුවර්තනය වීමේ හැකියාව:
- වෙනසට ඇති අකමැත්ත: පරිණාමය වන වෙළඳපොළ ප්‍රවණතාවලට සහ පාරිභෝගික රුචි-අරුචිකම්වලට අනුවර්තනය වීමට අපොහොසත් වීමෙන් ඔබේ ව්‍යාපාරය යල් පැන ගිය එකක් වනු ඇත.
- නිෂ්පාදන/සේවා විවිධත්වය අඩු වීම: ඔබේ නිෂ්පාදන හෝ සේවා ඔබටම අනන්‍ය නොවුනොත් හෝ ඒවා තරගකරුවන්ගේ නිෂ්පාදන හෝ සේවාවලට වඩා උසස් නොවුනොත්, පාරිභෝගිකයින් විසින් ඔබව නොව, ඔබේ තරගකරුවන්ව තෝරා ගනු ඇත.
මෙහෙයුම්:
- තොග කළමනාකරණය දුර්වල වීම: අතිරික්ත තොග නිසා ඔබේ ප්‍රාග්ධනය එක් තැනක සිර වී තිබෙන අතර, තොග ප්‍රමාණවත් නොවීම නිසා ඔබට විකුණුම් අහිමි විය හැකි.
- අකාර්යක්ෂම සැපයුම් දාම කළමනාකරණය: ඔබේ සැපයුම් දාමය තුළ ඇති වන ප්‍රමාද වීම් නිසා ඔබේ නිෂ්පාදන කටයුතු සහ බෙදාහැරීමේ කටයුතුවලට බලපෑම් ඇති විය හැකි.
තාක්ෂණයට අනුවර්තනය නොවීම:
- තාක්ෂණය අවම වශයෙන් භාවිතා කිරීම: අලෙවිකරණය, සන්නිවේදනය සහ මෙහෙයුම් වැනි ක්‍රියාවලීන් සඳහා නව තාක්ෂණය භාවිතා කිරීමට අපොහොසත් වීම මගින් ඔබේ කාර්යක්ෂමතාව අවම විය හැකි.
- සයිබර් ආරක්ෂාව ගැන සැලකිලිමත් නොවීම: සයිබර් ආරක්ෂාව වෙනුවෙන් නිසි පියවර නොගැනීම හරහා ඔබේ ව්‍යාපාරික දත්ත පිටතට ගොස් මූල්‍යමය වශයෙන් පාඩු ද සිදු විය හැකි.
ශ්‍රම බලකාය:
- කුසලතාවල අඩුලුහුඬුකම්: කුසලතා පිරිපුන් ශ්‍රම බලකායක් නොමැතිකම හේතුවෙන් ඔබේ ව්‍යාපාර සැලසුම් ක්‍රියාත්මක කිරීමේ දී ගැටලු මතු විය හැකි.
- ඉහළ සේවක හැර යෑම්: සේවා නියුක්තිකයන් වැඩි ප්‍රමාණයක් ව්‍යාපාරය හැර ගියහොත්, අලුත් සේවා නියුක්තිකයන් බඳවා ගැනීමට සහ පුහුණු කිරීමට වැඩි පිරිවැයක් යනු ඇත.
බාහිර සාධක:
- ආර්ථික අස්ථාවරත්වය: මුදල් ඒකකය උච්චාවචනය වීම, උද්ධමනය හා අනෙකුත් ආර්ථික අභියෝග නිසා ඔබේ ව්‍යාපාරයට අනිසි බලපෑම් ඇති විය හැකි.
- තරගකාරීත්වය: විශාල ව්‍යාපාරවලින් හෝ නව ව්‍යාපාරවලින් එල්ල කරන තරගකාරීත්වය නිසා වෙළඳපළ සහ ලාභාංශ බෙදී යා හැකි.
ඒ වෙනුවෙන් කළ හැකි දේවල්:
- සම්පූර්ණ ව්‍යාපාර විශ්ලේෂණයක් සිදු කරන්න (SWOT Analysis).
- වෘත්තීය මග පෙන්වීමක් ලබා ගන්න
- පාරිභෝගික තෘප්තිය කෙරෙහි අවධානය යොමු කරන්න
- තාක්ෂණය වැළඳ ගන්න
- නාස්තිය කළමනාකරණය කරන්න
- සේවකයින්ගේ වැඩිදියුණුව වෙනුවෙන් ආයෝජනය කරන්න
>>>ඔබේ SME ව්‍යාපාරය අර්බුදයකදී ප්‍රමාණයෙන් කුඩා කරන්නේ කෙසේද?
